Uchanganuzi wa Athari za Utamaduni Katika Tafsiri na Ukalimani wa Mahakama: Hali Halisi Kaunti ya Vihiga

Résumé

Utafiti huu umechunguza namna utamaduni unavyoathiri ukalimani na tafsiri katika mahakama ya kaunti ya Vihiga, ikizingatiwa kuwa kaunti hii imesheheni wingi wa lugha na mbari mbalimbali za Waluhya, hivyo, kuwepo kwa hitaji la ukalimani na tafsiri katika uendeshaji wa kesi mbalimbali mahakamani. Lahaja za Kitiriki na Kimaragoli zina utamaduni wao katika masuala mbalimbali kama vile: ndoa, tohara, mavazi, chakula, mawasiliano, na kadhalika. Utafiti huu umejikita katika utamaduni unaohusiana na mawasiliano pekee. Utafiti huu uliongozwa na nadharia ya Isimujamii iliyoasisiwa na William Labov (1972) na nadharia ya Usawe iliyoasisiwa na Vinay na Darbelnet (1958). Utafiti huu ulitumia muundo wa Kifani. Mbinu ya kimaksudi ya usampulishaji ilitumiwa huku data ikikusanywa kwa njia ya uchunzaji, uchanganuzi nyaraka, na mahojiano kisha kuwakilishwa na kuchanganuliwa kidhamira. Utafiti huu ulifanywa nyanjani katika mahakama kuu mbili za kaunti ya Vihiga: mahakama ya sheria ya Vihiga na ya Hamisi. Ili kuhakikisha udhabiti na uhalali wa vifaa vya ukusanyaji data, utafiti awali ulifanywa katika Mahakama ya kisheria ya Kakamega. Mbinu ya upimaji wa uhalali wa maudhui katika vifaa vya utafiti ilitumika. Matokeo ya utafiti huu yanadhihirisha kuwa, maneno ya kitamaduni ya lahaja za Kitiriki na Kimaragoli yanapodondoshwa wakati wa uhawilishaji, lugha pokezi inapokea hasara ya kutopata misamiati mipya. Wakalimani au watafsiri wanapolazimishwa kutamka maneno mwiko wananyimwa uwezo kuhifadhi uso wao katika mawasiliano ya kipragmatiki. Hivyo basi, matokeo ya utafiti huu yanadhihirisha kuwepo kwa athari za utamaduni wa lahaja ya Kitiriki na Kimaragoli katika tafsiri na ukalimani wa mahakama. Utafiti huu utaweza kuikuza taaluma ya tafsiri, ukalimani na isimu tekelezi kwa kutoa mchango wa jinsi ya kukalimani na kutafsiri diskosi mbalimbali