Vipengele Vya Fasihi Vinavyojenga Taswira Ya Mwanamke Katikavitabu Teule Vya Biblia Takatifu

Ikisiri

Lugha ni chombo cha kipekee kinachofinyangwa kuwasilisha taswira ya masuala changamano katika jamii. Matokeo haya ya lugha ni fasihi, ambayo ni kioo cha jamii. Biblia Takatifu ni kitabu mojawapo kikongwe cha fasihi ambacho huwasilisha taswira changamano kuhusu binadamu. Katika kitabu cha Mwanzo 1:26-27, lugha inayotumiwa katika Biblia Takatifu inatuchorea taswira kuhusu hadhi ya mwanamke na mwanamume kuinuliwa kwa pamoja kulingana na mpango asili uliopendekezwa na Mungu. Hata hivyo, kupitia hiyo Biblia Takatifu, tunakumbana na taswira changamano zinazowasilishwa kuhusu mwanamke. Hili huwezeshwa kupitia lugha. Ikumbukwe kuwa lugha inayotumika katika Biblia Takatifu ina athari kubwa katika uhalisia wa kijamii, ikizingatiwa kuwa idadi ya wakristo wanaozingatia mafunzo ya Biblia Takatifu ni wengi (bilioni 2.4). Utafiti huu unachanganua vipengele vya sanaa vinavyojenga taswira ya mwanamke katika vitabu teule vya Biblia Takatifu. Madhumuni yaliyoshughulikiwa ni Kwanza, kuchanganua maumbo ya fasihi yanayojenga taswira ya mwanamke katika vitabu teule vya Biblia Takatifu na pili, kudhihirisha maudhui yanayojitokeza katika maumbo yanayojenga taswira ya mwanamke katika vitabu teule vya Biblia Takatifu. Utafiti huu ulijikita tu kwa maumbo ya fasihi na maudhui yanayowasilishwa katika taswira ya mwanamke katika vitabu teule vya Biblia Takatifu, toleo la 2013. Utafiti ulizingatia mseto wa nadharia; nadharia ya Umuundo mpya iliyorejelewa na Crick (2016), nadharia ya Umaumbo ambayo ilirejelewa na MaryAnne (1999), na kiunzi cha nadharia ya Ufeministi kwa mujibu wa Wamitila (2003). Muundo wa kiuchanganuzi ulizingatiwa. Mbinu ya uchunzaji ilitumiwa kuufanikisha huu utafiti. Makala yanayodhihirisha taswira ya mwanamke katika Biblia Takatifu ndiyo yaliyodondolewa. Orodhahakiki ilitumiwa kudondoa data kutoka kwenye Biblia Takatifu ili kupata sampuli zifaazo za maumbo na maudhui. Usampulishaji dhamirifu ulitumiwa kwa kuongozwa na madhumuni ya utafiti huu. Utafiti umebaini kuwa maumbo ya fasihi yanayojenga taswira ya mwanamke katika Biblia Takatifu yanaibua maudhui hai, aidha yanayoishi katika jamii, hivyo, kuna uwezekano kuwa lugha katika Biblia Takatifu imeathiri jamii halisi kwa namna hasi na chanya. Utafiti unatarajiwa kuwafahamisha wanajamii na umma kwa jumla kuwa nafasi ya mwanamke ni muhimu katika kuendeleza jamii na utaweka wazi namna lugha katika Biblia Takatifu inavyoathiri mtazamo wa jamii halisi kumhusu mwanamke