Nafasi ya Mtindo Katika Utunzi wa Nyimbo Asili za Jamii ya Abagusii Kudhihirisha Ubabedume

الملخص

Utafiti huu ni sehemu ndogo ya utafiti wetu wa uzamifu ambao ulijikita kwenye mada Uchanganuzi wa Ubabedume katika Nyimbo Asili za Jamii ya Abagusii. Katika makala hii tumechambua namna mtindo umetumika katika nyimbo asili za jamii ya Abagusii kudhihirisha ubabedume. Katika utafiti huu tuliongozwa na nadharia ya Umtindo ambapo tulilenga kuchambua namna vipengele mbalimbali vya mtindo vimetumika katika utunzi wa nyimbo asili za jamii ya Abagusii kudhihirisha ubabedume. Tumeangazia baadhi ya vipengele vya kimtindo kama vile; tashbihi, maswali balagha, jazanda, usimulizi na takriri. Data za utafiti huu zilitokana na kusikiliza nyimbo asili kutoka kwenye mtandao wa Youtube, nyimbo asili alivyozirekodi Obuchi katika CD yake ya 2019. Tulizisikiliza kisha tukazinakili na kuzitafsiri kutoka lugha ya Ekehusii hadi lugha ya Kiswahili. Data nyingine muhimu zilitokana na usomaji wa tafiti zilizofanywa awali katika mada hii. Tulisoma tasnifu, majarida, vitabu na hata makala yaliyohusiana na mada hii. Mahojiano na wazee wa jamii ya Abagusii, wataalamu wa fasihi ya jamii ya Abagusii na wahadhiri wangu yalitufaa katika utafiti huu. Data ya utafiti huu ilichanganuliwa kwa mujibu wa lengo la utafiti huu tukiongozwa na mhimili wa nadharia ya umtindo unaosisitiza umuhimu wa vipengele vya fasihi kufumwa pamoja kupitia lugha ili kufanikisha mawasiliano. Uwasilishaji wa matokeo ya utafiti huu ulikuwa kupitia njia ya kithamano kwani ndiyo njia faavu zaidi ya kushughulikia mahusiano ya kijamii