Mitindo ya Uwasilishaji wa Suala la Afya Katika Matini Teule za Fasihi ya Kiswahili ya Watoto

Résumé

Fasihi ya Kiswahili ya Watoto ni mojawapo ya tanzu za fasihi ya Kiswahili inayotumiwa na wasanii kuhamasisha jamii kuhusu masuala yanayoiathiri kama vile magonjwa, uharibifu wa mazingira na ukiukaji wa haki za watoto miongoni mwa mengine. Zaidi ya hayo, madhara yanayotokana na changamoto za kiafya yamekuwa kikwazo katika maendeleo ya jamii na kuafikiwa kwa maendeleo endelevu katika mataifa mengi ulimwenguni. Kwa jinsi hii, makala hii ililenga kuchanganua mitindo ya uwasilishaji wa masuala ya kiafya yanayoathiri jamii na kutatiza kuafikiwa kwa maendeleo endelevu. Utafiti huu uliongozwa na malengo yafuatayo: Kuchunguza aina ya mitindo iliyotumiwa na waandishi wa matini teule kuwasilisha masuala ya kiafya, na kutathmini maana iliyowasilishwa na sitiari za kiafya katika mitindo ya uwasilishaji iliyotambuliwa katika matini teule. Matini zilizochanganuliwa katika kazi hii ni Madhila ya Bi. Shufaa (Bakari, 2016) na Kosa la Marehemu (Panja, 2010). Nadharia ya Umitindo iliyoasisiwa na Leech (1969) ili kuchunguza mitindo ya uwasilishaji wa kazi za kifasihi iliongoza utafiti huu. Aidha, uteuzi wa sampuli kimakusudi ulizingatiwa na data iliyokusanywa ilichanganuliwa kwa kuzingatia mkabala wa kimaelezo. Matokeo ya utafiti huu ni kuwa mitindo kama nyimbo, usimulizi na ushairi ilitumiwa kwa ufasaha kuwasilisha masuala ya kiafya katika matini teule. Vilevile, utafiti huu ulibainisha maana iliyowasilishwa na sitiari mbalimbali za kiafya zilizoangaziwa katika mitindo iliyotambuliwa. Uchunguzi zaidi ulipendekezwa kuhusu namna fasihi ya Kiswahili ya Watoto inavyoweza kutumiwa kidijitali kuangazia masuala ya kiafya yanayoathiri jamii. Hii ni kwa sababu mtindo wa kidijitali umeimarika sana kutokana na maendeleo ya kiteknolojia